خطوات وإجراءات التصالح في مخالفات البناء الجديد
▪️خطوات التصالح في مخالفات البناء
١- حضرتك هتروح الحي تفتح ملف بصورة بطاقة المالك و ورق الملكية .
٢ - خلال أسبوعين من تاريخ الملف حضرتك لازم تستوفي باقي المستندات طبقا للمادة ٣ من القانون .
✔️ إيه هي بقي المستندات المطلوبة :
١. أصول وصور ضوئية لمستندات الملكية.
٢. رسم هندسي ( معماري وإنشائي ) معتمد.
٣. تقديم ما يثبت الحاله الإنشائية للعقار ( دي إسمها شهادة سلامة إنشائية ودي ملف فرعي بيعملهولك مهندس... بيبقي فيه اللوائح والنوته الحسابية وتقرير التربة وشهادة السلامة نموذج ٢ ب وشهادة سلامة عليها علامة مائية لنقابة المهندسين وحاجات تانية بيجهزها المهندس والملف ده بيدخل نقابة المهندسين يعتمد بالكامل وبتدفع كمان رسوم دمغه للنقابة ٤.٥ ف الالف من قيمه الاعمال للمنشأت من اول ٢٠١٥ ).
٤. إيصالات مرافق ( مياه - غاز - كهرباء ) ودي عشان تثبت تاريخ المخالفة.
٥. في حالة عدم وجود إيصالات مرافق يتم إرفاق أي مستند يدل علي العقار وتاريخ المخالفة ( شهادة مشتملات - محضر مخالفه - تصوير جوي ).
٩. توكيل رسمي في حالة وجود محامي ( ودا أفضل طبعا جداً )
١٠. صورة ضوئية من بطاقة المالك
١١. ملف كارتون ودا عند الموظف أهم من كل اللي فات دا
📑 بعد ما بتقدم الملف ده بتدفع رسوم الفحص وبعد كده بتستني لجنة السلامة الإنشائية تحدد لك ميعاد تنزل تعاين العقار و المفروض بيكون في مندوب من الداخلية بيحضر لمراجعه أشتراطات الدفاع المدني
__ اللجنه بقي حسب ما بتشوف حاله المنشأ ممكن تطلب مستندات هندسية أخري زي كور تست أو كشف أحد عناصر المنشأ للتأكد من التسليح
او بتطلع تقريرها علي طول بعد كدة بقي بيراجعوا موقفك مع وزارة الطيران المدني
الكلام دا لحد تاريخ النهاردة وفالنهاية بيطلع تقرير نهائي للمصالحة بقبولها وتحديد قيمة الغرامة طبقا لكمية المخالفات اللي عندك أو برفض التصالح في عدم إستيفاء شروط السلامة أو بتخفيف المبني أو تدعيم المنشأ من الآخر بيشوفوا إيه الحل ويطلعولك تقرير وتقدير للمبلغ المطلوب
لحد كده تمام !
▪️نيجي بقي لتقدير رسوم الغرامه ودي تعتمد علي حاجتين :
ركز بقي معايا كده
١- مساحه المخالفة ( مساحه الارض في عدد الأدوار )
يعني لو أرض ١٠٠ متر طالعة ١٢ دور سكني ودور إداري ودور تجاري
تبقي المخالفه بتاعتك
..... ١٢٠٠ متر سكني
.... ١٠٠ متر تجاري
.... ١٠٠ متر اداري
وبعدين
٢- المنطقه اللي المنشا موجود فيها هل قرية أم مدينة علي شارع رئيسي ولا لا
دا بيحدد سعر متر المخالف والتسعير دا بينزل فالجريدة الرسمية بقرار من المحافظ لكل محافظة
تشوف سعر متر منطقتك كام فالاداري والتجاري والسكني وتضربه فالمساحه يطلعلك قيمة المخالفة
يعني مثلااااااا
لو انت ساكن فالاسكندريه حي منتزة أول او ثان قبلي وعلي شارع جانبي سعر المتر بيكون ٤٥٠ج سكني
٨٠٠ تجاري
٦٠٠ إداري
تبقي غرامتك ( ٤٥٠ ×١٢٠٠ + ٨٠٠ × ١٠٠ + ٦٠٠×١٠٠ = ٥٤١٤٠٠ج ) دا الا إذا كان في غرامات أخرى علي العقار .
لحد كده تمااام.....
نظام الدفع بقي بيكون ٢٥% والباقي بيتقسط علي ٤ سنوات يعني علي المثال بتاعنا
هتدفع ١٣٥٣٥٠ ج مقدم
و ١٠١٥١٢.٥ ج سنويا
🔹وأخيرا فالتصالح بيكون كالأتى :
١- تقديم طلب تصالح بصورة البطاقة وصورة عقد البيت و بعض المستندات الأخرى المذكورة بالقانون .
٢- بعد تقديم طلب التصالح و دفع رسم الفحص بيتم تسليمك شهادة تفيد تقديم ملف التصالح و بموجبها يتم إيقاف الإجراءات ضد المخالف و إيقاف تنفيذ الإزالة و إيقاف تنفيذ الأحكام فى حالة وجود أحكام و ذلك لحين البت فى ملف التصالح .
☑️ آخر موعد لتقديم التصالحات يوم 2020/9/30
🗒صوره طلب التصالح
🗒نموذج الشهاده
تعليقات
إرسال تعليق